సత్య సాయి భజన - సాయీశ్వర నీ పదముల సన్నిధి నే చేరినాను
సాయీశ్వర నీ పదముల సన్నిధి నే చేరినాను
సదానంద వార్నిధిలో సదా డోలలూగినాను
హరేరామ హరేకృష్ణ హరే సాయి హరే హరే
భజే సాయి శాంతిదాయి సత్య సాయి హరే హరే |సాయీశ్వర|
మనసులోన భక్తి సుధా మధురిమలే నింపినాను
కనులలోన కాంతి ప్రభా కవిత జ్యోతి నిలిపినాను
ఆరాధన పూర్వకముగ అనవరతము కొలిచినాను
తనివారగ దర్శించి తరియించెద స్వామి నేడు |సాయీశ్వర|
హృదయపథములో నిరతము పదయుగమును నిలిపినాను
భావవీధిలో సతతము సేవచేయ తలచినాను
ఆవేదన పొంగగ నను ఆదుకొనగ వేడినాను
పరమాద్భుత మహిమాన్విత కరుణ కోరినాను నేడు |సాయీశ్వర|
ఆశ్రిత జనకోటికెల్ల అభయమొసగు దాతనీవు
నామకీర్తనన మురియు నారాయణమూర్తి నీవు
లీలామానుష దేహుడు బోళాశంకరుడు నీవు
త్రిమూర్తి స్వరూపుడవు దీనబాంధవుడవు నీవు |సాయీశ్వర|
త్రేతాయుగమందు వెలయు సీతాపతి నీవుగదా
ద్వాపరమ్ములోన వెలుగు గోపాలుడు నీవుగదా
ఈ కలికాలమున అవతరించిన సాయీవి కదా
పర్తివాస పరమపురుష పరమాత్ముడ నీవే కదా |సాయీశ్వర|
No comments:
Post a Comment